Gənc musiqiçi: Fortepianoda ifa etdiyim zaman sanki başqa bir aləmdə oluram
Bakı, 14 sentyabr, Gülay Nəzərova, AZƏRTAC
AZƏRTAC beynəlxalq müsabiqələr laureatı olmuş Azərbaycanın gənc istedadlı musiqiçiləri haqqında məqalələr silsiləsini davam etdirir. Növbəti həmsöhbətimiz beynəlxalq və respublika müsabiqələri laureatı, Bakı Musiqi Akademiyasının “İnstrumental ifaçılıq” ixtisasının (fortepiano üzrə) tələbəsi Ayşə Məmmədovadır.
Ayşənin 19 yaşı var. O, Bakı şəhəri Nizami rayonu 251 nömrəli tam orta məktəbdə oxuyub. Həmçinin paralel olaraq 33 nömrəli Uşaq Musiqi Məktəbinə fortepiano ixtisasına daxil olub və həmin məktəbi fərqlənmə attestatı ilə bitirib. Suraxanı rayonunun Hövsan qəsəbəsi 280 nömrəli tam orta məktəbindən məzun olub. Orta məktəbdə oxuduğu illərdə fəxri diploma layiq görülüb. Ayşə bu il Azərbaycan Milli Konservatoriyası nəzdində Musiqi Kollecində təhsilini başa vurub və çoxdandır arzuladığı Bakı Musiqi Akademiyasına qəbul olub.
“Mən hələ uşaq ikən tamaşalarda (Azərbaycan Dövlət Akademik Musiqili Teatrında bir neçə tamaşada rol alıb – red.) həvəslə iştirak edirdim. Həmin illərdə bacım musiqi təhsili alırdı. Musiqi sahəsini seçməyimdə bacımın böyük rolu olub. O, musiqi məktəbində öyrəndiklərini mənimlə bölüşürdü. O vaxt 7 yaşımda idim. Mənim isə fortepianoya həvəsim vardı. Məqsədim gələcəkdə həm vokalçı, həm də pianoçu olmaq idi. Sonralar bir neçə fərqli ixtisasa yönəlsəm də, özümü hər zaman musiqidə tapmışam”, - deyən Ayşə bildirir ki, fortepianoda ifa etdiyi zaman musiqinin onda oyatdığı hissləri təsvir belə edə bilmir: “Sanki başqa bir aləmdə oluram, ruhum dincəlir, özümü xoşbəxt hiss edirəm”.
Ailəsi də Ayşəyə hər zaman dəstək olub və o, Uşaq Musiqi Məktəbində fortepiano ixtisası üzrə təhsil alıb. Hələ kiçik yaşlarından gələcək üçün böyük planları vardı. Seçdiyi ixtisas üzrə oxumaqla yanaşı, hətta bir neçə mahnı da bəstələyib. Özünün də dediyi kimi: “Xəyallarımın reallaşması üçün artıq addım atmağa başlamışdım...”.
Ayşə ən böyük arzusunun solo ifaçı kimi dünyanın bir çox ölkəsində Azərbaycanı təmsil etmək olduğunu deyir: “İxtisas olaraq fortepianonu seçsəm də, eyni zamanda, vokalçı və bəstəkar kimi də öz üzərimdə çalışıram. Azərbaycanı xarici ölkələrdə əsərləri ilə tanıtmış Fikrət Əmirov kimi dahi bəstəkarların həyatını oxuyanda həmişə öz-özümə deyirəm ki, mən də elə olmaq istəyirəm. Həqiqətən bir gənc olaraq ölkəmi xaricdə ifalarımla tanıtmaq mənim üçün qürurverici haldır. Dövlətimiz də gənc ifaçı kimi bizə bu yolda hər zaman dəstək göstərir. Prezident İlham Əliyev və Birinci vitse-prezident Mehriban xanım Əliyevanın bütün sahələrdə olduğu kimi, musiqi sahəsinə də göstərdiyi diqqət və qayğı biz gənclərin ən böyük motivasiya qaynağıdır. Bir sözlə, ölkəmi iştirak etdiyim bütün tədbirlərdə layiqincə təmsil etmək mənim üçün möhtəşəm hissdir”.
Bu istedadlı qız bir çox respublika və beynəlxalq müsabiqələrdə həm vokal, həm də fortepiano nominasiyası üzrə çıxış edib. 2020-ci ildə musiqi təhsilini davam etdirmək üçün Azərbaycan Milli Konservatoriyası nəzdində Musiqi Kollecinə daxil olub və fortepiano ixtisası üzrə təhsilini təkmilləşdirib. Bu il isə həmin kollecdən məzun olub. Musiqi kollecində təhsil aldığı illər ərzində ilk uğuru 2022-ci ildə Qazaxıstanda keçirilən “Astana Stars-Divertisment” adlı müsabiqədə qazanıb və fortepiano ifaçılığı üzrə I yerə layiq görülüb. Həmin ildə “Art Olimpia Ümid - 2022” müsabiqəsində də fortepiano nominasiyası üzrə I yeri qazanıb. Həmçinin Ümummilli Lider Heydər Əliyevə həsr olunan “Sən elə bir zirvəsən” adlı respublika müsabiqəsində vokal nominasiyası üzrə I yerə layiq görülüb. Bundan başqa, gənc olmasına baxmayaraq, “Azərbaycan Vokalçıları” adlı III Beynəlxalq Festivalında solo vokalçı kimi çıxış edib.
Fortepiano ifaçısı qazandığı uğurlarda müəllimi Esmira Əliyevanın böyük rolu olduğunu deyir. Esmira xanım gənc ifaçıya estrada janrının sirlərini öyrədib, ona hər zaman dəstək olub.
Fortepiano müəllimi, beynəlxalq və respublika laureatı Esmira Əliyeva şagirdi haqqında təəssüratlarını sevə-sevə danışır: “Çağdaş dövrümüzdə istedadlı tələbələrin üzə çıxarılması, onlara diqqət və qayğı göstərilməsi hər bir tədris müəssisəsinin, müəllimin qarşısında duran ümdə vəzifədir. Peşəsini sevən müəllimin ən böyük nailiyyəti onun yetirmələridir. Tələbənin uğuru müəllim üçün ən böyük sevinc, qürur hissidir. Ayşə Məmmədova bizim musiqi ocağımızın parlaq yetirmələrindəndir. O, istedadlı gəncdir. İlk gündən bunu hiss etmişdim. Zənnimdə yanılmadım. Ayşə istedadı və əzmkarlığı nəticəsində bir çox uğur qazanıb. Müxtəlif müsabiqələrdə əldə etdiyi qalibiyyət və mükafatlar onu daha da ruhlandırıb”.
Ayşə, bu il Bakı Musiqi Akademiyasının “İnstrumental ifaçılıq” ixtisasına (fortepiano üzrə) qəbul olub. Ümidvarıq ki, o, təhsilini uğurla davam etdirəcək və bizləri beynəlxalq müsabiqələrdə əldə etdiyi yeni-yeni nailiyyətlərlə sevindirəcək.
Bölmənin digər xəbərləri
