WUF13 ölkəmiz üçün mühüm perspektivlər və yeni imkanlar müəyyənləşdirir – ŞƏRH
Bakı, 25 may, AZƏRTAC
Müasir şəhərsalma işinin əsas prioritetləri məxsusi olaraq insanların həyat keyfiyyətinin yüksəldilməsinə, ekoloji davamlılığa, inklüzivliyə və iqtisadi səmərəliliyə xidmət edir. Bu işin ictimai önəmi də, siyasi istiqaməti də məhz insan amilinə əsaslanır. Azərbaycan dövləti də bu prioritetləri əsas tutaraq ölkəmizdə şəhərsalma siyasətinin mahiyyətini tam şəkildə ortaya qoymaq, insan resurslarını ictimai örnək kimi təqdim etmək məqsədilə Bakıda Ümumdünya Şəhərsalma Forumunun 13-cü Sessiyasının keçirilməsini mühüm hesab edib.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva söyləyib.
O bildirib ki, WUF13 dünya miqyasında böyük maraq və diqqətlə qarşılandı. Sessiyada 182 ölkədən 45 mindən artıq iştirakçının qeydiyyatdan keçməsi tədbirin yüksək beynəlxalq nüfuzunu və Azərbaycanın qlobal platformalarda getdikcə artan rolunu aydın şəkildə nümayiş etdirir.
"Nəzərə alaq ki, Ümumdünya Şəhərsalma Forumunun 13-cü Sessiyası COP29-dan sonra ölkəmizin ev sahibliyi etdiyi ikinci ən böyük beynəlxalq tədbirdir. Bu fakt Azərbaycanın beynəlxalq əməkdaşlıq məkanında artan siyasi çəkisini bir daha nümayiş etdirir və əldə olunan bütün bu uğurlar dövlətimizin iqtisadi inkişaf göstəricilərindən xəbər verir.
Bu, həm də onu göstərir ki, Azərbaycan beynəlxalq siyasi, iqtisadi və humanitar platformalarda etibarlı tərəfdaş, mühüm təşəbbüslərin müəllifi və nüfuzlu təşkilatçı kimi çıxış edir. Prezident İlham Əliyev Ümumdünya Şəhərsalma Forumunun 13-cü Sessiyasında çıxışı zamanı dünyanı narahat edən bir sıra məsələlərə diqqət çəkdi, müasir şəhərsalma siyasətinin əsas istiqamətlərini, Azərbaycanın urbanizasiya təcrübəsini, tarixi-mədəni irsin qorunması sahəsində həyata keçirilən genişmiqyaslı işləri bu siyasətin mühüm tərkib hissəsi kimi xarakterizə etdi və bütün bunları beynəlxalq ictimaiyyətin diqqətinə çatdırdı.
Ölkə rəhbərinin çıxışında aydın şəkildə vurğulandı ki, şəhərsalma məsələləri təkcə bir tədbirin mövzusu deyil, həm də Azərbaycanın qədim dövlətçilik ənənələrinə, memarlıq irsinə, Qarabağ və Şərqi Zəngəzurun bərpasına, ekoloji yenilənmə siyasətinə və dayanıqlı inkişaf modelinə dair mühüm mesajlar daşıyır. Bu istiqamətdə bundan sonra da beynəlxalq aləmin diqqətinin məhz bu kimi məsələlərə yönələcəyi gözlənilir", - deyə K. Əliyeva vurğulayıb.
Professor əlavə edib ki, Azərbaycanın coğrafi və mədəni baxımdan Şərqlə Qərbin qovşağında yerləşməsi bütün dünyaya məlumdur. Prezident İlham Əliyev də çıxışında bu amilin böyük əhəmiyyət daşıdığını xüsusi vurğulamışdı.
"Ümumdünya Şəhərsalma Forumunun 13-cü Sessiyası bir daha nümayiş etdirir ki, Azərbaycan yalnız regionun deyil, bütövlükdə beynəlxalq məkanın mühüm şəhərsalma, urbanizasiya və dayanıqlı inkişaf mərkəzlərindən birinə çevrilməkdədir. Əvvəlki illərdə Ümummilli Lider Heydər Əliyevin başladığı qlobal proqramlar da məhz bu prosesə xidmət edirdi. Həmin dövrdə həyata keçirilən bütün layihələr insanların rifahının yüksəldilməsinə, tarixi yaddaşın qorunmasına və gələcək nəsillər üçün sağlam urbanizasiya mühitinin yaradılmasına istiqamətlənmişdi.
WUF13 həm ölkəmiz, həm də xalqımız üçün mühüm perspektivlər və yeni imkanlar müəyyənləşdirir", - deyə o əlavə edib.
Bölmənin digər xəbərləri
