ƏHMƏD CÖVDƏT İSMAYIL OĞLU HACIYEV
Azərbaycan mədəniyyətinə ağır itki üz vermişdir. Respublikanın görkəmli musiqi xadimi, Bakı Musiqi Akademiyasının professoru, SSRİ Dövlət mükafatları laureatı, əməkdar incəsənət xadimi, xalq artisti Əhməd Cövdət İsmayıl oğlu Hacıyev 2002-ci il yanvarın 18-də ömrünün 85-ci ilində vəfat etmişdir.
Cövdət Hacıyev 1917-ci ildə Azərbaycanın Şəki şəhərində anadan olmuşdur. O, orta təhsilini başa vurduqdan sonra 1935-1938-ci illərdə Azərbaycan Dövlət Konservatoriyasında, 1938-1941-ci illərdə isə Moskva Konservatoriyasında oxumuş və müharibə illərində yarımçıq qalmış təhsilini sonralar davam etdirərək, 1947-ci ildə dahi bəstəkar Dmitri Şostakoviçin sinfini bitirmişdir. Cövdət Hacıyev 1947-ci ildən ömrünün sonuna qədər bəstəkarlıq fəaliyyəti ilə yanaşı, Bakı Musiqi Akademiyasında dərs demiş, 1957-1969-cu illərdə isə bu ali musiqi təhsili ocağının rektoru vəzifəsində çalışmışdır.
Öz böyük istedadı və zəngin təcrübəsi sayəsində milli və dünya musiqi sənəti ənənələrini novatorcasına inkişaf etdirən Cövdət Hacıyevin adı Azərbaycan musiqi tarixinə milli simfonizmin banilərindən biri kimi daxil olmuşdur. Böyük Üzeyir Hacıbəyovun ölməz irsi və ənənələrinin yorulmaz təbliğatçısı və davamçısı olan bu sənətkar Azərbaycan peşəkar musiqisində özünəməxsus yeni yollar açmışdır. Cövdət Hacıyevin musiqisi vətəndaşlıq qayəsi, demokratizmi, dərin məzmunu və yüksək bədiiliyi ilə səciyyələnir. O, hələ tələbəlik illərində ilk böyük əsəri olan bir hissəli "Simfoniya"nı, iki simfonik poemasını, "Azərbaycan süitası"nı, simli kvartet və sair əsərlərini bəstələmişdir. Cövdət Hacıyev sənətdə elə ilk addımlarından Azərbaycan musiqisində aparıcı mövqelərdən birini tutmuşdur. O, 1945-ci ildə Qara Qarayevlə birlikdə yazdığı "Vətən" operasına görə SSRİ Dövlət mükafatına layiq görülmüşdür.
Görkəmli sənətkara ən çox şöhrət gətirən onun ayrı-ayrı illərdə bəstələdiyi səkkiz simfoniyasıdır. Onun simfonik musiqisini qəhrəmanlıq motivləri, humanizm, insanın mənəvi gözəlliyinin tərənnümü səciyyələndirir. Bəstəkar bu simfoniyalarda Azərbaycan xalq musiqisinin müxtəlif janrlarının bədii ifadə vasitələrindən, inkişaf prinsiplərindən məharətlə istifadə etmişdir. Cövdət Hacıyev həmçinin simfoniyetta, oratoriya, ballada, sonata, skerso və kvartet-poemanın, xor üçün bir sıra dəyərli əsərlərin müəllifidir.
Cövdət Hacıyevin "Zirvələrə" adlanan Altıncı və "Şəhidlər" adlı Yeddinci simfoniyaları sənətkarın vətəndaşlıq mövqeyinin parlaq ifadəsidir. Azərbaycanın müstəqilliyi uğrunda canlarını qurban vermiş şəhidlərimizin xatirəsinə həsr etdiyi Yeddinci simfoniyası müdrikliyi, dərin fəlsəfi düşüncələri, mübarizlik ruhunu aydın musiqi dili ilə təcəssüm etdirir.
Azərbaycan bəstəkarlıq məktəbinin inkişafında böyük rol oynamış Cövdət Hacıyev ölkəmizdə peşəkar musiqi kadrlarının hazırlanmasında da misilsiz xidmətlər göstərmişdir. O, Azərbaycan bəstəkarlarının bir neçə nəslini yetişdirmiş gözəl pedaqoq olmuşdur.
Cövdət Hacıyevin Azərbaycan musiqi mədəniyyətinin inkişafı və təbliğindəki xidmətləri yüksək qiymətləndirilmişdir.O, iki dəfə SSRİ Dövlət mükafatına layiq görülmüş, bir çox orden və medallarla, o cümlədən Azərbaycan Respublikasının ali mükafatı - "Şöhrət" ordeni ilə təltif olunmuşdur.
Cövdət Hacıyevin fitri istedad, böyük zəhmətsevərlik, xalqımızın zəngin musiqi ənənələrinə sonsuz sədaqətlə səciyyələnən və dünya musiqi mədəniyyətindən bəhrələnən yaradıcılığı müasir Azərbaycan musiqi sənəti tarixinin ən parlaq səhifələrindən birini təşkil etmiş, xalqa sədaqətli xidmətin gözəl nümunəsi olmuşdur. Onun yüksək sənətkarlıqla yaratdığı simfonik əsərlər Azərbaycan musiqi xəzinəsinin qızıl fonduna həmişəlik daxil olmuş, mədəniyyətimizə böyük şöhrət qazandırmışdır.
Görkəmli bəstəkar, mahir pedaqoq, əsl ziyalı və gözəl insan Cövdət Hacıyevin əziz xatirəsi Azərbaycan xalqının qəlbində əbədi yaşayacaqdır.
Allah rəhmət eləsin!
Heydər Əliyev
Murtuz Ələsgərov
Artur Rasizadə
Ramiz Mehdiyev
Elçin Əfəndiyev
Hacıbala Abutalıbov
Fatma Abdullazadə
Polad Bülbüloğlu
Misir Mərdanov
Nizami Xudiyev
Anar Rzayev
Bəxtiyar Vahabzadə
Vasif Adıgözəlov
Fərhad Bədəlbəyli
Arif Məlikov
Hacı Xanməmmədov
Ramiz Mustafayev
Azər Rzayev
Tofiq Bakıxanov
Aqşin Əlizadə
Xəyyam Mirzəzadə
Firəngiz Əlizadə
Ramiz Mirişli
Musa Mirzəyev
Rauf Abdullayev
X x x
Mərhumun cənazəsi vidalaşmaq üçün 2002-ci il yanvarın 19-da saat 11-dən 14-ə qədər Bakı Musiqi Akademiyasının binasında (Şəmsi Bədəlbəyli küçəsi, 98) qoyulacaqdır.
Dəfn mərasimi Fəxri Xiyabanda olacaqdır.
Bölmənin digər xəbərləri
