TƏZƏPİR MƏSCİDİNDƏ MATƏM MƏRASİMİ
Günorta duasından sonra məscidin həyətində ehsan verildi.
Qafqaz Müsəlmanları İdarəsinin sədri şeyxülislam hacı Allahşükür Paşazadənin, Bakının və Xəzəryanı bölgənin yepiskopu Aleksandrın və Azərbaycanın dağ yəhudiləri icmasının başçısı Semyon İxiilovun Rusiya Federasiyasının Prezidenti Vladimir Putinə, Moskvanın və bütün Rusiyanın patriarxı II Aleksiyə göndərdikləri başsağlığında deyilir ki, Azərbaycanın din xadimləri və müxtəlif konfessiyalara mənsub olan mömin insanlar Rusiya xalqının bu müsibətini öz faciəsi kimi qarşılamışlar. Erməni silahlı birləşmələrinin yüzlərlə uşağı, qadın və qocanı qətlə yetirdiyi Xocalı faciəsini yaşamış Azərbaycan xalqı Beslanda törədilmiş mənhus cinayəti ürəkağrısı ilə qarşıladı.
Beslandakı o dəhşətli faciə özünün qana hərisliyini bütün dünyaya göstərən terrorizmin qələbəsi deyildir, əksinə, rüsvaycasına məğlubiyyətidir.
Din liderləri xalqları müdrikliyə və Bir olan Yaradanın amallarına sadiqliyə, şər və zoraklıq qüvvələri ilə, Tanrının insana bəxş etdiyi həyata qarşı hər cür qəsdlərlə qəti mübarizəyə çağırmışlar.
Dindarlar birgə ibadət zamanı Tanrıya dua etdilər ki, bəşəriyyət ədavətə, düşmənçiliyə qalib gəlsin, sülhə və həmrəyliyə nail olsun.
Hər üç dinin – müsəlman, xristian və yəhudi dinlərinin nümayəndələri Beslan faciəsindən zərər çəkənlərə yardım üçün vəsait toplanmasını təşkil etdilər.
Matəm mərasimində Azərbaycandakı dini icmaların başçıları, xarici ölkələrin səfirləri, ictimaiyyətin nümayəndələri iştirak edirdilər.
Sonda şeyxülislam hacı Allahşükür Paşazadə jurnalistlərin suallarına cavab verdi.
