İlham Əliyev öz andına sadiqdir
Bakı, 26 avqust (AZƏRTAC). Azərbaycanda yeni prezident seçkiləri yaxınlaşır və azərbaycanlıların əksəriyyəti Prezident vəzifəsinə dövlətin indiki başçısı İlham Əliyevin yenidən seçilməsini istəyir. Bu, təəccüblü deyildir, çünki o, xalqa verdiyi bütün vədləri yerinə yetirir.
İlham Əliyevin 2003-cü ildə ölkənin Prezidenti vəzifəsinin icrasına başladığı zaman birinci çıxışında dediyi sözləri xatırlatmaq istərdim: “Mən hər bir Azərbaycan vətəndaşı üçün Prezident olacağam. Milliyyətindən, dinindən, siyasi əqidəsindən asılı olmayaraq, hər bir Azərbaycan vətəndaşının Prezidenti olacağam və Azərbaycan xalqının etimadını doğruldacağam”.
Həqiqətən də belə oldu: o, hər bir Azərbaycan vətəndaşı üçün Prezident oldu və xalqın etimadını doğrultdu. Ötən on il aydın şəkildə göstərdi ki, İlham Əliyev özünün birinci və ikinci prezidentlik müddətləri ərzində ölkənin həyatının bütün sahələrində verdiyi vədlərin hamısını, o cümlədən qaçqınlara və məcburi köçkünlərə verdiyi bütün vədləri yerinə yetirmiş, onların sosial problemlərini həll etmişdir.
O, bütün bu illər ərzində ulu öndər Heydər Əliyevin demokratik, hüquqi və dünyəvi dövlət quruculuğuna yönəldilmiş müstəqillik siyasətini qətiyyətlə həyata keçirmişdir. Onun rəhbərliyi altında ölkədə iqtisadi islahatlar sürətləndirilmiş, regionların sosial-iqtisadi inkişafına dair Dövlət Proqramı qəbul edilmişdir. Bu da Azərbaycanın Cənubi Qafqazda lider dövlətə çevrilməsinə xidmət etmişdir. İlham Əliyevin dərindən düşünülmüş daxili islahatları və ölçülüb-biçilmiş xarici siyasəti sayəsində hazırda Azərbaycan dinamik inkişaf edən ölkədir.
Azərbaycanın xarici dövlətlərlə iqtisadi və mədəni əlaqələrinin genişlənməsində, bütövlükdə Azərbaycanın dünya birliyinə inteqrasiyasında İlham Əliyevin böyük xidmətlərini vurğulamaq lazımdır. Onun uğurlu xarici siyasəti sayəsində beynəlxalq və regional problemlərin həllində Azərbaycanın rolu artır. Beynəlxalq birlikdə erməni təcavüzkarlarının işğalçılıq siyasətinin ifşa edilməsi və Ermənistanın Avropa Şurasında təcavüzkar dövlət kimi tanınması işində İlham Əliyevin böyük xidmətləri vardır. Nəticədə Qərbdə Azərbaycanın ayrılmaz tərkib hissəsi olan Dağlıq Qarabağ haqqında obyektiv rəy formalaşmış, Ermənistan-Azərbaycan, Dağlıq Qarabağ hərbi münaqişəsinə düzgün siyasi qiymət verilmiş və onun həlli yolunda mühüm addımlar atılmışdır.
İlham Əliyev geniş dünyagörüşü, dərin və hərtərəfli biliyi, yüksək mədəniyyəti sayəsində bütün beynəlxalq görüşlərdə və yüksək səviyyəli danışıqlarda ölkəsinin maraqlarını uğurla müdafiə edən güclü və çevik siyasətçi kimi böyük hörmət və nüfuz qazanmışdır.
İlham Əliyev Heydər Əliyevin milli-mədəni dəyərlərin qorunub saxlanılması və inkişaf etdirilməsi xəttini həyata keçirərkən Azərbaycan xalqının tarixi keçmişinə, bu gününə və gələcəyinə xüsusi qayğı ilə yanaşır. O, Azərbaycanın birinci xanımı Mehriban Əliyeva ilə birlikdə Azərbaycan mədəniyyətinin, incəsənətinin və musiqisinin bütün dünyada təbliğ olunmasına böyük diqqət yetirir. O, müdrik dövlət xadimi və uzaqgörən siyasətçi kimi xalqın rifahını və xoşbəxt gələcəyini təmin etmək üçün vətənpərvər, hərtərəfli inkişaf etmiş və sağlam gənclərin tərbiyə olunmasının da qayğısına qalır.
Bu gün ölkədə sabitlik, yeni iş yerlərinin açılması, layiqli həyat şəraiti, uşaqları təhlükəsiz şəraitdə böyütmək hər bir vətəndaş üçün vacibdir və bütün bunları Prezident İlham Əliyev təmin edir. Onun böyük təcrübəsi, dünyada yüksək nüfuzu Azərbaycana yeni uğurlar gətirəcəkdir. Mən İlham Əliyevin hələ birinci prezidentliyi ərəfəsində “İlham Əliyev yeni dövrün siyasətçisidir” (“Bakinski raboçi” qəzeti, 20 avqust 2003-cü il) sərlövhəli məqaləmdə, daha sonra “İlham Əliyev Azərbaycanın sabahkı lideridir? Nə üçün də olmasın?!!!” (“Ukraynada çıxan “Politika i kultura” jurnalı, sentyabr 2003-cü il), “Ata da prezident olduğu bir vaxtda “millətin atası” olmaq asandırmı?” (“Kiyevski teleqraf”, 5-18 may 2006-cı il), “Konstitusiyanı təkmilləşdirərkən: Prezident hər şeyə cavabdehdir” (Kiyevski Teleqraf”, 20-26 fevral 2009-cu il) sərlövhəli məqalələrimdə bu barədə yazmışam.
Bu kontekstdə onun Dünya Azərbaycanlılarının III qurultayında söylədiyi sözləri xatırlamaq yerinə düşər. O demişdir ki, dövlət strukturları, diplomatik nümayəndəliklər həmvətənlərimizin qayğısına qalmalı, ölkəmizin hüdudlarından kənarda yaşayan və işləyən alimləri və başqa azərbaycanlıları dəstəkləməlidirlər. Prezident nitqində vurğulamışdır: “Səfirliklərlə diaspor təşkilatları arasındakı əməkdaşlıq daha da güclü, daha da məqsədyönlü olmalıdır. Biz istəyirik ki, hər bir azərbaycanlı yaşadığı yerdən asılı olmayaraq, yaxşı yaşasın, zəngin olsun, imkanları geniş olsun. Bizim onlardan yeganə arzumuz ondan ibarətdir ki, ətrafda olan soydaşlara da kömək göstərsinlər... Bu kömək ümummilli lider Heydər Əliyevin bizə vəsiyyət etdiyi “azərbaycançılıq” ideyasının prinsiplərinə uyğun gəlsin”.
Qürur hissi ilə deyə bilərəm ki, bu gün Azərbaycan Heydər Əliyev tərəfindən müəyyən olunmuş və əsası qoyulmuş yolla gedir. Ölkə Ulu Öndərin istədiyi kimi inkişaf edir. Bütün bunlar öz xalqını sevən, Azərbaycanın bu günü və gələcəyi barədə düşünən İlham Əliyevin davamlı, sarsılmaz və inamlı siyasəti sayəsində mümkün olur.
Arif Quliyev, hüquq elmləri doktoru, Ukraynanın Əməkdar Təhsil İşçisi,
Kiyev Milli Aviasiya Universitetinin Beynəlxalq hüquq kafedrasının professoru,
“Xalq Diplomatiyası İnstitutu” ictimai təşkilatı idarə heyətinin başçısı
Bölmənin digər xəbərləri
