Astarada çəltik yığımı başa çatıb
Astara, 16 dekabr, İlkin Adıyev, AZƏRTAC
Cari ildə Astara rayonunda çəltikçiliyin inkişafı istiqamətində aparılan tədbirlər nəticəsində 306,5 hektar sahədə çəltik əkini həyata keçirilib. Mövsüm ərzində aqrotexniki qaydalara düzgün əməl olunması, suvarma təminatının vaxtında aparılması və fermerlərin bu sahəyə artan marağı məhsuldarlığa müsbət təsir göstərib.
Astara Rayon Statistika İdarəsindən AZƏRTAC-ın bölgə müxbirinə bildirilib ki, biçin işləri yekunlaşan sahələrdən ümumilikdə 1225,5 ton çəltik məhsulu əldə olunub ki, bu da ötən ilin müvafiq göstəricisi ilə müqayisədə 3 faiz çoxdur. Məhsuldarlıq isə 41,1 sentner təşkil edib.
Rayonda çəltikçiliklə məşğul olan fermerlər və məhsul istehsalçıları cari ildə yüksək məhsuldarlığı və keyfiyyət göstəriciləri ilə seçilən - “Haşimi”, “Apola”, “Qara çəltik” və “Avanqard” çəltik sortlarına üstünlük veriblər.
Qeyd edək ki, 2024-cü ildə Astara rayonunda 290 hektar sahədə çəltik əkini aparılıb və mövsümün sonunda bu sahələrdən 1190,2 ton çəltik məhsulu götürülüb. Ötən ilin göstəriciləri ilə müqayisədə cari ildə həm əkin sahələrinin genişlənməsi, həm də məhsul istehsalının artması rayonda çəltikçiliyin inkişaf etdiyini və bu sahənin fermerlər üçün getdikcə daha cəlbedici sahəyə çevrildiyini göstərir.
Bölmənin digər xəbərləri
